Loading...

ગુજ્જુના આઈડિયાએ કમાલ કરી! હવે ફક્ત મિસ્ડ કોલથી પણ મોબાઈલ પેમેન્ટ થઈ શકશે

UPI123Pay-Payment by just Missed Call: શું ફક્ત મિસ કોલ કરો અને બિલની ચૂકવણી થઈ જાય કે પેમેન્ટ ચુકાવાઈ જાય? આ આઇડિયા ગમી જાય તેવો છેકે નહીં હવે તે હકીકત બની રહ્યો છે. યાદ હોય તો જ્યારે મોબાઈલ ફોનનો જમાનો નવો નવો હતો ત્યારે ઘણાં ભારતીયો માટે તો મિસ્ડ કોલ જાણે કે સંદેશાવ્યવહારની પદ્ધતી બની ગઈ હતી.

મૂળ કચ્છ ભુજના આ ગુજરાતીના આઈડિયાથી હવે તમે મિસકોલ દ્વારા પણ પેમેન્ટ ચૂકવણી કરી શકશો.

હાઈલાઈટ્સ:

  • આ ગુજરાતીના વિચારે ભારતની ડિજિટલ પેમેન્ટ સર્વિસમાં ક્રાંતી આવી છે, હવે ફક્ત મિસ્ડ કોલથી પણ પેમેન્ટ થશે.
  • સ્માર્ટફોન ન હોય તેવા લોકો કે પછી જેમને ડિજિટલ પેમેન્ટ એપ્સનો ઉપયોગ ન ફાવતો હોય તેમના માટે ટેક્નોલોજી.
  • ગત સપ્તાહાં આરબીઆઈએ UPI123pay લૉન્ચ કરી એવા લોકો માટે ખાસ સુવિધા ઉભી કરી છે.

અમદાવાદઃ શું ફક્ત મિસ કોલ કરો અને બિલની ચૂકવણી થઈ જાય કે પેમેન્ટ ચુકાવાઈ જાય? આ આઇડિયા ગમી જાય તેવો છેકે નહીં હવે તે હકીકત બની રહ્યો છે. યાદ હોય તો જ્યારે મોબાઈલ ફોનનો જમાનો નવો નવો હતો ત્યારે ઘણાં ભારતીયો માટે તો મિસ્ડ કોલ જાણે કે સંદેશાવ્યવહારની પદ્ધતી બની ગઈ હતી. પોતાની સગવડ પ્રમાણે એક અને બે મિસ્ડ કોલ કે ટૂંકા અને લાંબા મિસ્ડ કોલના અલગ અલગ અર્થ તૈયાર કરીને બે વ્યક્તિ એકબીજા સાથે એક પણ અક્ષર બોલ્યા વગર વાત કરી લેતી હતી. તેની જેમ હવે મિસ્ડ કોલથી પેમેન્ટ પણ થઈ શકશે. મૂળ 2016માં જ્યારે કેન્દ્રની મોદી સરકારે ડિમોનેટાઈઝેશન કર્યું અને નાણાંબંધી આવતાં જ ડિજિટલ પેમેન્ટ સિસ્ટમ સ્વીકારવી સમયની જરુરિયાત બની ગઈ. જોકે તે સમયે ઘણાં એવા લોકો હતા જેમની પાસે સ્માર્ટ ફોન નહોતો તો ઘણાં એવા પણ હતાં જેમની પાસે સ્માર્ટફોન તો હતો પરંતુ ડિજિટલ પેમેન્ટ પ્લેટફોર્મનો ઉપયોગ તેમના માટે ખૂબ જ મુશ્કેલ હતો અને તેઓ આ સમસ્યાથી ઝઝૂમી રહ્યા હતા. તેવા સમયે કચ્છ ભુજના વતની મિતેશ ઠક્કરે વિચાર કર્યો કે સ્માર્ટફોન ન હોય તેવા લોકોને પણ ડિજિટલ પેમેન્ટની આ નવી દુનિયામાં સશક્ત બનાવવા જોઈએ.

ઠક્કરે અમારા સહયોગી ટાઈમ્સ ઓફ ઇન્ડિયા સાથે વાત કરતાં કહ્યું કે, ‘ભલે હાલ વસ્તીનો ઘણો મોટો ભાગ QR કોડ સ્કેન કરીને પેમેન્ટ કરતાં થઈ ગયો છે અથવા તો કેશલેસ સિસ્ટમના બીજા કોઈ માધ્યમનો ઉપયોગ કરી રહ્યો છે. તેમ છતાં એક મોટો વર્ગ એવો છે જે આ જગતથી અળગો છે. જેના માટે જવાબદાર કારણોમાં ફક્ત નવી ટેક્નોલોજીથી અજાણ જ નહીં પરંતુ નબળા ઈન્ટરનેટ કનેક્શન, સ્માર્ટફોન આધારીત આ પ્રકારની એપ્સની કોમ્પ્લિસિટી પણ છે.’ આ કારણે જ ઠક્કરે વિકસાવેલી ટેક્નોલોજી મિસકોલપે દ્વારા યુઝર્સ જે નંબર પર પેમેન્ટ કરવું હોય તેને મિસકોલ આપીને રિટર્નમાં તેના પરથી રિટર્ન કોલ મેળવી શકે છે અને પછી પીન આપે એટલે પેમેન્ટ થઈ જાય છે.

તેમનો આઈડિયા CIIE.CO, IIM અમદાવાદ (IIM-A), નેશનલ પેમેન્ટ્સ કોર્પોરેશન ઓફ ઈન્ડિયા (NPCI) અને બિલ એન્ડ મેલિન્ડા ગેટ્સ ફાઉન્ડેશન (BMGF)ના 2019માં ઈન્ક્યુબેટર દ્વારા આપવામાં આવેલી ચેલેન્જમાં ત્રણ વિજેતાઓમાંનો એક હતો. અન્ય બે Gupshup અને ToneTag – બંને ઑફલાઇન સાઉન્ડ-આધારિત સિસ્ટમ્સ (ઇન્ટરેક્ટિવ વૉઇસ રિસ્પોન્સ અને પ્રોક્સિમિટી સાઉન્ડ) નો ઉપયોગ કરીને પેમેન્ટ ઇનિશિએટ કરવા અને ઓથેન્ટિકેટ કરવા માટે ઉપયોગ થાય છે. ભારતીય રિઝર્વ બેંક (RBI) દ્વારા આ અઠવાડિયાની શરૂઆતમાં UPI123pay લૉન્ચ કરતી વખતે ગ્રામીણ ભારતને લક્ષ્યાંક બનાવી મોટા વર્ગનો ડિજિટલ પેમેન્ટ સિસ્ટમમાં સમાવેશ કરવા માટે ત્રણેય ટેક્નોલોજીને અપનાવવામાં આવી છે. CIIE.COના અધિકારીઓએ જણાવ્યું હતું કે ત્રણ ટેક્નોલોજી “નાણાકીય માર્કેટમાં આગામી લહેરનું નિર્માણ કરી રહી છે”.

CIIE.COના COO પ્રિયંકા ચોપરાએ જણાવ્યું હતું કે આજના વાતાવરણમાં તમામ સેગમેન્ટના વપરાશકર્તાઓ માટે સમાવેશી અને ઉપયોગમાં સરળ પેમેન્ટ સોલ્યુશન્સની જરૂરિયાત વધુ પ્રબળ બની છે. તેમણે કહ્યું કે, “અમે ફીચર ફોન યુઝર્સ માટે ડિજીટલ પેમેન્ટ્સને સક્ષમ બનાવતી આ ક્ષમતા અંગે ખૂબ જ ઉત્સાહિત છીએ, જેમને તેની સૌથી વધુ જરૂર છે.”

BMGF ખાતે ગરીબો માટે નાણાકીય સેવાઓ અંગેના ભારતના અગ્રણી ડૉ. પવન બક્ષીએ જણાવ્યું હતું કે ચેલેન્જમાં વિજેતા બનેલી ટેક્નોલોજીઓ ભારતમાં ફીચર ફોનનો ઉપયોગ કરતા 400-500 મિલિયનથી વધુ લોકોને સુરક્ષિત, ઉપયોગમાં સરળ પેમેન્ટ સેવાઓ પ્રદાન કરવાની ક્ષમતા ધરાવે છે. ”કોઈપણ નવા વપરાશકર્તા માટે સૌથી મોટો ભય તેમની વિગતોનો દુરુપયોગ અને છેતરપિંડી છે. આમ, આવી કોઈપણ સિસ્ટમ વાપરવા માટે સરળ અને શક્ય તેટલી સલામત હોવી જરૂરી છે.” તેમ ઠક્કરે કહ્યું હતું.

Leave a Reply

Your email address will not be published.

Main Navigation